ہم ایک دوسرے کے بارے میں کیا ذمہ داری رکھتے ہیں؟

مقدمہ

ہمارے سامنے آنے والے یہ دن صرف ایسی مناسبتیں نہیں ہیں کہ جن میں ہم چند شخصیات کو یاد کریں یا کچھ واقعات کی یاد منائیں۔ بلکہ یہ مواقع ہمارے سامنے ایک زیادہ اہم اور ذمہ داری پیدا کرنے والا سوال رکھتے ہیں کہہم ایک دوسرے کے بارے میں کیا ذمہ داری رکھتے ہیں؟

جن علماء اور دانشوروں کو ہم یاد کرتے ہیں، وہ ہمیں علم کی ذمہ داری کی طرف متوجہ کرتے ہیں؛ مولانا ہمیں اپنی باطنی اور اخلاقی زندگی کی طرف دعوت دیتے ہیں؛ بہرے افراد اور بزرگوں سے متعلق دن ہمیں انسانی عزت، احترام اور اجتماعی شمولیت کی یاد دہانی کراتے ہیں؛ یومِ اساتذہ ہمیں تعلیم کی ذمہ داری کا احساس دلاتا ہے؛ اور عدمِ تشدد کا دن ہمیں ان اخلاقی حدود کی طرف متوجہ کرتا ہے جنہیں اختلاف اور تنازع کے وقت ہمیں ملحوظ رکھنا چاہیے۔

اگر ہم ان تمام مناسبتوں کو ایک ساتھ دیکھیں تو یہ ہمیں ایک مفید فکری خاکہ فراہم کرتی ہیں کہ اسلامی اقدار آج کی دنیا میں ہمارے سیکھنے، سکھانے، اختلاف کرنے، دوسروں کی دیکھ بھال کرنے اور اجتماعی زندگی گزارنے کے طریقے کو کس طرح تشکیل دے سکتی ہیں۔

۳۰ ستمبر: مولانا رومی کا یومِ بزرگداشت:

مولانا جلال الدین محمد بلخی رومی (۱۲۰۷ء–۱۲۷۳ء)، فارسی زبان کے عظیم شاعر، متکلم اور صوفی مفکر تھے۔ ان کے خاندان نے آخرکار قونیہ میں سکونت اختیار کی۔

سنہ ۱۲۴۴ء میں ان کی ملاقات شمس الدین تبریزی سے ہوئی، جس نے ان کی روحانی اور ادبی زندگی کے سفر پر گہرا اثر ڈالا۔

ان کی عظیم تصانیف مثنوی معنوی اور دیوانِ شمس فارسی اور اسلامی ادب کے ایسے لازوال آثار بن گئے جو آج بھی دنیا بھر میں پڑھے جاتے ہیں۔

آج کا پیغام:

ہم کوشش کریں کہ علم صرف معلومات کے حصول تک محدود نہ رہے، بلکہ وہ حکمت، کردار سازی اور اللہ تعالیٰ کے ساتھ گہری وابستگی کا ذریعہ بن جائے۔

يکم اکتوبر: بزرگ افراد کا عالمی دن :

دنیا بھر میں بزرگ افراد کی تعداد میں اضافے کے ساتھ، معاشروں کو ایسے مسائل کا سامنا ہے جیسے تنہائی، امتیازی سلوک، صحت کی دیکھ بھال، معاشی تحفظ اور بزرگ افراد کی معاشرے میں بامقصد شرکت۔

اسلام والدین کے احترام اور بالخصوص بڑھاپے کے زمانے میں ان کے ساتھ رحمت، محبت اور عزت کے ساتھ پیش آنے پر بہت زیادہ تاکید کرتا ہے۔

قرآن کریم فرماتا ہے:

وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا ۚ إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلَاهُمَا فَلَا تَقُلْ لَهُمَا أُفٍّ وَلَا تَنْهَرْهُمَا وَقُلْ لَهُمَا قَوْلًا كَرِيمًا

"اور آپ کے پروردگار نے فیصلہ کر دیا ہے کہ تم اس کے سوا کسی کی عبادت نہ کرو اور والدین کے ساتھ نیکی کرو۔ اگر ان دونوں میں سے کوئی ایک یا دونوں تمہارے پاس بڑھاپے کو پہنچ جائیں تو انہیں اُف تک نہ کہنا، نہ انہیں جھڑکنا، بلکہ ان سے عزت و احترام کے ساتھ بات کرنا۔"

(سورۂ اسراء، ۱۷:۲۳)

آج کا پیغام:

جو معاشرہ اپنے بزرگوں کا احترام کرتا ہے، وہ دراصل اپنی تاریخ، تجربے، حکمت اور اخلاقی تسلسل کی حفاظت کرتا ہے۔

۲  اکتوبر: عدمِ تشدد کا عالمی دن:

ایسی دنیا میں جو مسلح تنازعات، نفرت انگیز رویّوں، گھریلو تشدد اور سماجی تقسیم کا سامنا کر رہی ہے، روزِ عدمِ تشدد انسانوں کو دعوت دیتا ہے کہ وہ اختلافات کو پُرامن طریقوں سے حل کرنے کے راستے اختیار کریں۔

اسلام صرف تشدد کی مذمت تک محدود نہیں رہتا، بلکہ مومنوں کو یہ تعلیم دیتا ہے کہ وہ دوسروں کی برائی کے مقابلے میں صبر، ضبطِ نفس اور حسنِ اخلاق کے ساتھ جواب دیں۔

قرآن کریم فرماتا ہے:

وَلَا تَسْتَوِي الْحَسَنَةُ وَلَا السَّيِّئَةُ ۚ ادْفَعْ بِالَّتِي هِيَ أَحْسَنُ فَإِذَا الَّذِي بَيْنَكَ وَبَيْنَهُ عَدَاوَةٌ كَأَنَّهُ وَلِيٌّ حَمِيمٌ

"اور نیکی اور بدی برابر نہیں ہو سکتی۔ برائی کو اس طریقے سے دور کرو جو سب سے بہتر ہو، پھر وہ شخص جس کے درمیان اور تمہارے درمیان دشمنی تھی، ایسا ہو جائے گا جیسے وہ گہرا دوست ہو۔"

(قرآن کریم، سورۂ فصلت، ۴۱:۳۴)

آج کا پیغام:

عدمِ تشدد کا مطلب کمزوری، خاموشی یا ظلم کے سامنے جھک جانا نہیں ہے؛ بلکہ یہ ایک سوچا سمجھا اور اخلاقی انتخاب ہے کہ انسان ناانصافی کے مقابلے میں اپنے اصولوں اور اخلاقی اقدار کو قربان کیے بغیر مضبوط موقف اختیار کرے۔

۲۱ ربیع الثانی  – ۳       اکتوبر: ملا محسن فیض کاشانی کا  یوم وفات:

ملا محسن فیض کاشانی (۱۵۹۸ یا ۱۵۹۹ء–۱۶۷۹ء)

صفوی دور کے عظیم، کثیرالجہت اور نہایت پُرکار علماء میں شمار ہوتے ہیں۔ انہوں نے علومِ قرآن، حدیث، فقہ، اخلاق، فلسفہ اور روحانی علوم کے میدان میں گراں قدر تصانیف چھوڑیں۔

انہوں نے اصفہان اور شیراز میں تعلیم حاصل کی اور فکری طور پر بزرگ علماء، جیسے شیخ بہاء الدین عاملی (شیخ بہائی) اور میرداماد سے قریبی علمی تعلق رکھا۔ زندگی کے آخری ایام انہوں نے کاشان میں گزارے۔

فیض کا علمی ورثہ ہمیں یہ سبق دیتا ہے کہ دینی علوم، عقلی تحقیق، اخلاقی تربیت اور روحانی تزکیہ ایک دوسرے سے جدا نہیں بلکہ ایک مکمل انسانی کمال کے مختلف پہلو ہیں۔

آج کا پیغام:

ہمیں اپنے دینی بزرگوں کو پہچاننا چاہیے اور اپنی نئی نسل کو بھی ان سے متعارف کرانا چاہیے تاکہ وہ ان کے علمی اور عملی نمونوں سے فائدہ حاصل کر سکیں۔

۲۲   ربیع الثانی – ۴      اکتوبر:   ملا احمد نراقی کا یومِ  وفات :

ملا احمد نراقی (تقریباً ۱۱۸۵–۱۲۴۵ھ) قاجار دور کے ممتاز شیعہ فقیہ، عالم، مصنف اور شاعر تھے۔ وہ مشہور عالم ملا محمد مہدی نراقی کے فرزند تھے۔ ان کی مشہور تصانیف میں شامل ہیں:

• عوائد الایام
• مستند الشیعہ
• معراج السعادۃ
• خزائن

وہ ایک وسیع وبائی بیماری کے دوران وفات پا گئے جو کاشان اور اس کے اطراف میں پھیلی ہوئی تھی۔ انہیں نجف اشرف میں اپنے والد کے پہلو میں دفن کیا گیا۔

ملا احمد نراقی کا علمی ورثہ یہ ظاہر کرتا ہے کہ دینی علم کو اپنے زمانے کے حقیقی مسائل سے مربوط ہونا چاہیے اور فقہ، اخلاق اور فکر کے ذریعے معاشرے کی رہنمائی کرنی چاہیے۔

آج کا پیغام:

دینی علم کو وحی الٰہی میں اپنی بنیاد رکھنی چاہیے، لیکن ساتھ ہی اسے اپنے زمانے کی ضروریات اور حقیقی مسائل کا ذمہ دارانہ جواب بھی دینا چاہیے۔

۵/ اکتوبر: اساتذہ  کا عالمی دن:

ایسے دور میں جب اساتذہ کو تیز رفتار تکنیکی تبدیلیوں، تعلیمی نظاموں پر بڑھتے ہوئے دباؤ، نقل مکانی اور ہجرت، سب کے لیے یکساں تعلیم کی فراہمی کے مسائل، اور بدلتی ہوئی سماجی توقعات جیسے چیلنجز کا سامنا ہے، اساتذہ کی حمایت کرنا معیاری تعلیم کے تحفظ کے لیے بنیادی ضرورت ہے۔

اسلام نے علم حاصل کرنے اور علم سکھانے کو غیر معمولی اہمیت دی ہے۔ وحیِ الٰہی کا آغاز ہی لفظ "اقرأ” (پڑھو) سے ہوا، اور قرآن کریم بارہا علم کو انسانی ذمہ داری، شعور اور روحانی ترقی کے ساتھ جوڑتا ہے۔

اللہ تعالیٰ قرآن کریم میں فرماتا ہے:

هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ ۗ إِنَّمَا يَتَذَكَّرُ أُولُو الْأَلْبَابِ

"کیا وہ لوگ جو جانتے ہیں اور وہ لوگ جو نہیں جانتے برابر ہو سکتے ہیں؟ حقیقت یہ ہے کہ نصیحت صرف عقل رکھنے والے ہی قبول کرتے ہیں۔"

(سورۂ زمر، ۳۹:۹)

علم صرف معلومات کا نام نہیں؛ بلکہ علم انسان کو حقیقت کی پہچان، ذمہ داری کا احساس، اخلاقی شعور اور خداوندِ عالم کی معرفت تک پہنچانے والا راستہ ہے۔ ایک استاد صرف کتاب کا مضمون منتقل نہیں کرتا، بلکہ وہ انسان کی شخصیت، سوچ، اخلاق اور مستقبل کی تعمیر میں حصہ لیتا ہے۔

اسی لیے اسلام میں معلم کا مقام بلند ہے، کیونکہ وہ انسان کو جہالت سے علم، کمزوری سے شعور، اور بے سمتی سے ہدایت کی طرف لے جاتا ہے۔

آج کا پیغام:

ہم معلمی کو صرف اسکول یا مدرسے کے استاد تک محدود نہ سمجھیں۔ ہم میں سے ہر شخص کسی نہ کسی اعتبار سے معلم ہے:

• شوہر اپنی اہلیہ کے لیے،
• والدین اپنی اولاد کے لیے،
• دوست اپنے دوستوں کے لیے،
• خاندان کے افراد ایک دوسرے کے لیے،
• اور انسان خود اپنے نفس کے لیے۔

لہٰذا ہمیں اپنی اس ذمہ داری کو اچھی طرح ادا کرنا چاہیے اور اپنے کردار، اخلاق اور عمل کے ذریعے دوسروں کے لیے بہترین مثال بننا چاہیے۔

اختتامیہ

ان تمام مناسبتوں کو ایک ساتھ دیکھیں تو ایک خوبصورت پیغام سامنے آتا ہے:

علم ہمیں ذمہ دار بناتا ہے؛
روحانی معرفت ہمیں اپنے باطن کی اصلاح کی طرف لے جاتی ہے؛
بزرگوں کا احترام ہمیں اپنی جڑوں سے جوڑتا ہے؛
بہرے اور کمزور طبقات کی خدمت ہمیں انسانی کرامت کا شعور دیتی ہے؛
اساتذہ ہمیں مستقبل کی تعمیر کا راستہ دکھاتے ہیں؛
اور عدمِ تشدد ہمیں سکھاتا ہے کہ اختلاف کے باوجود اخلاقی اصولوں کو کیسے محفوظ رکھا جائے۔

اسلامی تعلیمات ہمیں یاد دلاتی ہیں کہ انسان صرف اپنی ذات کا ذمہ دار نہیں، بلکہ اپنے اردگرد کے لوگوں، اپنے معاشرے اور پوری انسانیت کے بارے میں بھی ذمہ دار ہے۔

اللہ تعالیٰ ہمیں توفیق عطا فرمائے کہ ہم علم کو عمل میں، عبادت کو اخلاق میں، اور اپنی ذمہ داریوں کو خدمتِ خلق میں تبدیل کر سکیں۔

آمین یا رب العالمین۔