تاریخی مناسبتیں،  بطور درسِ اخلاق

تمہید

قمری سال کی گردش کے ساتھ، یہ شمارہ ایسے واقعات کو یکجا کرتا ہے جو صرف یاد رکھنے کے لئے نہیں بلکہ ان سے سبق لے کر زندگی گزارنے کے لئے ہیں۔ ان میں سے ہر واقعہ مسلمانوں کو دعوت دیتا ہے کہ وہ تاریخ کو صداقت، عبادت کو خدمت، اور علم کو بہتر کردار میں تبدیل کرنے کے لئے پڑھاکریں۔

۲۴ ذوالحجہ: نجران کے عیسائیوں کے ساتھ مباہلہ؛ آیتِ تطہیر کا نزول

قرآن کریم حضرت عیسیٰؑ کی حقیقت کے بارے میں گفتگو کے بعد نجران کے عیسائی وفد کو رسولِ اکرم ﷺ کی جانب سے دی گئی دعوت کا ذکر کرتا ہے؛ ایک عظیم دعا اور مناجات کی دعوت، جس کے ذریعے  سچائی واضح ہو اور جھوٹ کا منہ کالا ہو۔ مفسرین نے اس  آیت کو مشہور واقعۂ مباہلہ سے مربوط قرار دیا ہے، اور آیتِ تطہیر پر بھی خاص زور دیا ہے جسے اہلِ بیتِ رسول ﷺ سے متعلق نازل ہوئی۔

آج کا پیغام:

واقعۂ مباہلہ میں رسولِ اکرم ﷺ نے اللہ تعالیٰ کے حکم سے اپنے باایمان خاندان پر اعتماد کیا۔ اپنے ایمان اور اپنے اہلِ خانہ اور بچوں کے ایمان کی حفاظت کریں، کیونکہ یہ ایک بے مثال سرمایہ ہے، خصوصاً ایسے دور میں جب دین سے دوری عام ہوتی جا رہی ہے۔

۲۴ ذوالحجہ: رکوع کی حالت میں امام علیؑ کا انگوٹھی عطا کرنا (آیتِ ولایت)

جیسا کہ سورۂ مائدہ کی آیت 55 میں اشارہ کیا گیا ہے، امام علیؑ نے رکوع کی حالت میں اپنی انگوٹھی ایک محتاج کو عطا کی۔ بعد میں بہت سے مسلمانوں نے اس عمل کو ایسے ایمان کی گہری علامت قرار دیا جو سخاوت کے ذریعے ظاہر ہوتا ہے۔ یہ آیت عبادت، صدقہ اور ولایت کو ایک ہی اخلاقی دائرے میں جمع کرتی ہے:

إِنَّمَا وَلِيُّكُمُ اللَّهُ وَرَسُولُهُ وَالَّذِينَ آمَنُوا الَّذِينَ يُقِيمُونَ الصَّلَاةَ وَيُؤْتُونَ الزَّكَاةَ وَهُمْ رَاكِعُونَ

"تمہارا ولی تو صرف اللہ، اس کا رسول، اور وہ مومنین ہیں جو نماز قائم کرتے ہیں اور حالتِ رکوع میں زکوٰۃ ادا کرتے ہیں۔”

(سورۂ مائدہ، آیت 5:55)

آج کا پیغام:

اپنی عبادات کو محتاجوں کی مدد کے ساتھ مکمل اور مؤثر بنائیں۔

۲۴ ذوالحجہ: سربکف جیالوں  کی کامیاب تحریک

یہ تحریک آٹھویں صدی ہجری (چودھویں صدی عیسوی) میں سبزوار کے شیعوں کی ایک تاریخی اور مذہبی ایک کامیاب تحریک تھی۔ یہ تحریک منگولوں کے ظلم کے خلاف اٹھی اور ایران پر ان کی ایک صدی سے زائد حکمرانی کے خاتمے کا سبب بنی۔

آج کا پیغام:

ظلم کے سامنے خاموش نہ رہیں۔ بعض اوقات کم از کم اتنا تو کیا جا سکتا ہے کہ ظالم کی مصنوعات خریدنے سے انکار کر دیا جائے۔

۲۷ ذوالحجہ: بنو اُمیہ کی حکومت کا خاتمہ

بنو اُمیہ کی خلافت، جس کی بنیاد معاویہ بن ابی سفیان نے 41 ہجری میں رکھی، 91 برس تک قائم رہی۔ اس دوران مسلمانوں پر بے شمار ظلم و ستم ڈھائے گئے۔ اموی حکومت کا خاتمہ اس حقیقت کو آشکار کرتا ہے کہ ظلم، سرکشی اور بغاوت کا انجام نہایت دردناک ہوتا ہے، اور دنیا میں بھی ظالموں کا انجام سخت اور عبرتناک ہوتا ہے۔

آج کا پیغام:

آج کے دور میں ظالموں کی جھوٹی شان و شوکت آپ کو مایوس نہ کرے؛ ان کا انجام نہایت دردناک ہوگا۔

۲۸ ذوالحجہ: واقعۂ حرّہ

683ء میں یزید بن معاویہ کی افواج اور مدینہ کے انصار و مہاجرین کے درمیان جنگِ حرّہ پیش آئی، جو یزید کی خلافت کے مخالف تھے۔ اگرچہ مدینہ کے مسلمانوں کو عسکری برتری حاصل تھی، لیکن مدینہ کے ایک گروہ کی غداری کے باعث یزیدی فوج شہر میں داخل ہوگئی اور وسیع پیمانے پر قتل و غارت گری کی۔

آج کا پیغام:

اسلامی معاشروں میں ظاہری مسلمان مگر خائن اور نادان افراد سے ہوشیار رہیں۔

۲۸ ذوالحجہ: ملا ہادی سبزواری کایوم وفات

حاج ملا ہادی سبزواری ایک ایرانی استاد اور فلسفی تھے جنہوں نے اسلامی فلسفے میں حکمت کی روایت کو فروغ دیا اور ایک ایسا علمی مکتب قائم کیا جس نے دور دراز علاقوں کے طلبہ کو اپنی جانب متوجہ کیا۔ ان کی فکری میراث وحی، عرفانی معرفت اور فلسفے کو ایک منظم فکری روایت میں جوڑنے میں نمایاں ہے۔

آج کا پیغام:

ایسا علم حاصل کریں جو عبادت میں گہرائی اور ذہن میں عاجزی پیدا کرے۔

۲۹ ذوالحجہ: آیت اللہ محمد ہادی معرفت کا یوم وفات

آیت اللہ محمد ہادی معرفت عصرِ حاضر کے ممتاز شیعہ عالم اور علومِ قرآن کے ماہر تھے۔ وہ تاریخِ قرآن، تفسیر اور قرآنی علوم کے موضوعات پر اپنی گراں قدر تصنیفات کی وجہ سے معروف تھے۔ ان کی کتابوں نے بہت سے قارئین کو قرآنِ کریم کے فہم میں دقت اور وفاداری کے ساتھ مدد فراہم کی۔

آج کا پیغام:

قرآنِ کریم کی تعلیم، فہم اور اس پر عمل کو اپنی اور اپنے اہلِ خانہ کی زندگی کا سب سے اہم شعار بنائیں۔

۱ محرم: نئے ہجری قمری سال کا آغاز

ہجری قمری تقویم کی بنیاد رسولِ اکرم ﷺ کی مکہ سے مدینہ ہجرت پر رکھی گئی ہے، اور اس کا پہلا سال یکم محرم سے شروع ہوتا ہے۔ اس طرح یہ تقویم کسی پیدائش یا تاج پوشی سے نہیں بلکہ ہجرت، قربانی اور ایک خدا پر ایمان رکھنے والی معاشرت کے قیام سے شروع ہوتی ہے۔

آج کا پیغام:

نئے سال کا آغاز توبہ، مقصدیت اور اپنی ذمہ داری کے واضح احساس کے ساتھ کریں۔

۱ محرم: ابرہہ کا مکہ کی جانب لشکر کشی کرنا

ابرهہ، جو یمن میں حبشی عیسائی حکمران کا نائب تھا، اسلامی روایت میں مکہ پر ناکام حملے کی وجہ سے مشہور ہے۔ مسلمانوں کی یادداشت میں یہ واقعہ اللہ تعالیٰ کی طرف سے بیت اللہ کی حفاظت اور سورۂ فیل کے ساتھ وابستہ ہے۔

آج کا پیغام:

طاقت کے ظاہری مظاہروں سے مرعوب نہ ہوں؛ اپنا بھروسہ اللہ پر رکھیں، طاقت پر نہیں۔

۱ محرم: شعبِ ابی طالب کا محاصرہ

بنی ہاشم، رسولِ اکرم ﷺ اور آپؐ کے پیروکاروں کا معاشی اور سماجی بائیکاٹ کیا گیا، جس کے باعث انہیں شعبِ ابی طالب میں پناہ لینی پڑی۔ انہوں نے کئی سال شدید معاشی اور سماجی دباؤ میں گزارے۔ اسلامی تاریخ میں یہ دور محرومی، اتحاد اور استقامت کی علامت سمجھا جاتا ہے۔

آج کا پیغام:

مشکل اور تنگی کے اوقات میں ایک دوسرے کے ساتھ متحد، وفادار اور فیاض رہیں۔

۱ محرم: زکوٰۃ جمع کرنے کا نبوی حکم

مدینہ میں اسلامی معاشرے کے قیام کے بعد زکوٰۃ محض ایک انفرادی نیکی نہیں رہی بلکہ ایک منظم ادارے کی شکل اختیار کر گئی۔ رسولِ اکرم ﷺ نے زکوٰۃ جمع کرنے کے لیے نمائندے مقرر فرمائے تاکہ مسلمانوں کے مال کو پاک کیا جائے اور اسے منصفانہ طور پر تقسیم کیا جا سکے۔ قرآن کریم اس ذمہ داری کا یوں ذکر کرتا ہے:

خُذْ مِنْ أَمْوَالِهِمْ صَدَقَةً تُطَهِّرُهُمْ وَتُزَكِّيهِمْ بِهَا

"ان کے اموال میں سے صدقہ وصول کیجیے تاکہ اس کے ذریعے آپ انہیں پاکیزہ اور بابرکت بنائیں۔”

(سورۂ توبہ، آیت103)

یہ آیت واضح کرتی ہے کہ زکوٰۃ صرف ایک سماجی ذمہ داری نہیں بلکہ دینے والے اور معاشرے دونوں کی پاکیزگی کا ذریعہ ہے۔

آج کا پیغام:

ضرورت مندوں کی مدد کرکے اپنے مال کو پاکیزہ بنائیں۔

۲۶ خرداد: محتشم کاشانی کی یاد میں یومِ شعرِ آئینی

محتشم کاشانی صفوی دور کے ایک ممتاز ایرانی شاعر تھے، جنہیں بالخصوص واقعۂ کربلا اور امام حسینؑ کی شہادت پر لکھی گئی مرثیہ نگاری کے سبب شہرت حاصل ہوئی۔ ان کی شاعری محرم کی ثقافت کا اہم حصہ بن چکی ہے اور آج بھی کلاسیکی مذہبی شاعری کے معروف ترین نمونوں میں شمار ہوتی ہے۔

آج کا پیغام:

ایسے الفاظ استعمال کریں جو ضمیر کو بیدار کریں اور حق سے محبت کو مزید گہرا بنائیں۔