آنے والی نسلیں ہمارے بارے میں کیا کہیں گی؟ 

تمہید

اس وقت ہم گزشتہ واقعات پر غور کر رہے ہیں اور ان سے سبق سیکھ رہے ہیں۔ کاش ہم حال میں اس طرح زندگی گزاریں کہ آنے والی نسلیں جب ماضی کی طرف دیکھیں تو ہمارے ان اقدامات اور ان فیصلوں کو قدر و تشکر کے ساتھ یاد کریں جو ہم نے اپنے زمانے میں کئے  تھے۔

۲۸ صفر: رسولِ اکرم ﷺ کی رحلت اور امام حسن مجتبیٰؑ کی شہادت

۲۸ صفر، مدینہ منورہ میں حضرت محمد مصطفیٰ ﷺ کی رحلت کا دن ہے، جو ۱۱ ہجری میں واقع ہوئی۔ اسی دن ۵۰ ہجری میں آپ ﷺ کے گرامی قدر نواسے، امام حسن مجتبیٰؑ کی شہادت بھی یاد کی جاتی ہے۔

رسول اللہ ﷺ کی رحلتاور ائمہ علیہم السلام کی شہادت مسلمانوں کو یہ یاد دلاتی ہے کہ اسلام کا تسلسل کسی ایک رہبر کی جسمانی موجودگی پر منحصر نہیں، بلکہ وحی، اخلاقی اصولوں، عدالت، نبوی کردار اور نبوی شخصیت کی حفاظت پر منحصر ہے۔

قرآن کریم رسول اللہ ﷺ کی رسالت کو یوں بیان کرتا ہے:

لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِمَنْ كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيرًا

یقیناً تمہارے لئے  رسولِ خدا ﷺ میں بہترین نمونۂ عمل ہے، اس شخص کے لئے  جو اللہ اور روزِ آخرت کی امید رکھتا ہو اور اللہ کو بہت زیادہ یاد کرتا ہو۔
(سورۂ احزاب، ۳۳:۲۱)

آج کا پیغام:

رسول اللہ ﷺ سے حقیقی وفاداری اسوقت ظاہر ہوتی ہے جب ہم اپنے زمانے کے حالات میں ان کی رحمت، عدالت اور حکمت کو جاری کریں۔

۳۰ صفر: امام علی بن موسیٰ الرضا علیہ السلام کی شہادت

۳۰ صفر، آٹھویں امام، حضرت امام علی بن موسیٰ الرضا علیہ السلام کی ۲۰۳ ہجری میں شہادت کا دن ہے۔

امام رضا علیہ السلام کو بالخصوص ان کے علم، فکری مباحث میں فعال شرکت اورمختلف دینی و فلسفیانہ نظریات اور دلائل کا جواب دینے کی صلاحیت کی وجہ سے یاد کیا جاتا ہے۔

اہل بیت علیہم السلام کی فکری سنت کے بنیادی اصولوں میں سے ایک یہ ہے کہ علم کو تواضع، اخلاقی ذمہ داری اور اللہ تعالیٰ سے قربت کے ساتھ حاصل کیا جائے۔

آج کا پیغام:

ضروری ہےکہ ہم علم کے ذریعے  ایمان کو مزید گہرا کریں؛ گفتگوکےذریعے   باہمی فہم اور ادراک کو مضبوط کریں؛ اور علمی و فکری برتری کے ذریعے   ہمیشہ اچھے کردار اور اخلاق کے ساتھ زندگی بسر کریں۔

یکم ربیع الاول: رسولِ اکرم ﷺ کی مکہ سے مدینہ ہجرت

رسولِ گرامی اسلامﷺ کی ہجرت صرف ایک شہر سے دوسرے شہر کا سفر نہیں تھا؛ بلکہ یہ مسلمانوں کی اس تبدیلی کا نقطۂ آغاز تھا جس میں مکہ کی مظلوم اور دباؤ کا شکار اقلیت سے مدینہ میں ایمان، باہمی اتحاد اور ذمہ داری پر قائم ایک معاشرہ وجود میں آیا۔  بعد میں ہجرت کو اسلامی کیلنڈر  کا نقطۂ آغاز قرار دیا گیا۔

آج کا پیغام:

 جب  حالات تبدیلی اورنقل مکانی کا تقاضا کریں تو ایمان، تیاری، شجاعت اور اللہ پر توکل کے ساتھ اس راستے کی طرف بڑھیں جو درست ہو۔

یکم ربیع الاول: لیلۃ المبیت (شبِ ہجر ت)

مکہ کے مشرکین نے طے کیا کہ ہر قبیلے سے ایک شخص منتخب کیا جائے اور سب مل کر رسولِ اکرم ﷺ کو قتل کردیں، تاکہ بنی ہاشم ان کے خون کا بدلہ نہ لے سکیں۔

وہ اس طرح رسول اللہ ﷺ کی رسالت کا خاتمہ کرنا چاہتے تھے اور اسی ظلم و جہالت کی تاریکی میں قائم رہنا چاہتے تھے۔

رسول اللہ ﷺ کو ان کے منصوبے کا علم ہوگیا۔ جب رسول اللہ ﷺ محفوظ طریقے سے مکہ سے نکلنے والے تھے تو امام علی علیہ السلام اس رات رسول اللہ ﷺ کے بستر پر سو گئے۔ اسی مناسبت سے ان کے بارے میں یہ آیت نازل ہوئی:

وَمِنَ النَّاسِ مَنْ يَشْرِي نَفْسَهُ ابْتِغَاءَ مَرْضَاتِ اللَّهِ وَاللَّهُ رَءُوفٌ بِالْعِبَادِ

اور لوگوں میں سے کوئی ایسا بھی ہے جو اللہ کی خوشنودی حاصل کرنے کے لئے  اپنی جان فروخت کردیتا ہے، اور اللہ اپنے بندوں پر بہت مہربان ہے۔
(سورۂ بقرہ،  آیت 207)

آج کا پیغام:

وہ زندگی جس کا محور اللہ تعالیٰ ہو، اس کا معیار صرف وہ چیزیں نہیں جو ہم حاصل کرتے ہیں، بلکہ یہ بھی ہے کہ ہم حق اور دوسروں کی بھلائی کے لئے  کیا کچھ قربان کرنے کو تیار ہیں۔

۴ ربیع الاول: رسولِ اکرم ﷺ کا غارِ ثور سے مدینہ کی طرف سفر

غارِ ثور میں چند راتیں قیام کے بعد رسولِ اکرم حضرت محمد ﷺ اور آپ کے ساتھی نے مدینہ کی طرف سفر جاری رکھا۔

قرآن کریم غار میں رسول اللہ ﷺ کے قول کو یوں نقل کرتا ہے:

لَا تَحْزَنْ إِنَّ اللَّهَ مَعَنَا

غم نہ کرو، بے شک اللہ ہمارے ساتھ ہے۔
(سورۂ توبہ، آیت40)

آج کا پیغام:

اللہ پر توکل ہمیں زیادہ پرسکون اور ذمہ دار بنانا چاہیے، نہ کہ ہماری تیاری اور ذمہ داری کو کم کرنے کا سبب۔

۵ ربیع الاول: حضرت سکینہ سلام اللہ علیہا، دخترِ امام حسین علیہ السلام کی وفات

حضرت سکینہ سلام اللہ علیہا،امام حسین علیہ السلام کی دختر، سانحۂ کربلا اوراس کے نتائج، یعنی خاندانِ رسالت کی اسیری اور جبری سفر سے گزریں۔

حضرت سکینہ سلام اللہ علیہا کی زندگی ہمیں یاد دلاتی ہے کہ کسی تاریخی سانحے کے اخلاقی نتائج میدانِ جنگ کے خاموش ہوجانے کے ساتھ ختم نہیں ہوتے۔

یاد و حافظہ کو محفوظ رکھنا، گواہی دینا اور حق کی حفاظت کرنا، خود ناانصافی کے خلاف مزاحمت کی ایک شکل ہے۔

آج کا پیغام:

ماضی کو یاد کرنا یعنی حقیقت کی حفاظت،مظلوموں کی عزت وکرامت کا پاس رکھنا اور یہ قبول نہ کرنا ہے کہ ناانصافی اجتماعی حافظے سے مٹا دی جائے۔

۵ ربیع الاول: شہیدِ ثانی، زین الدین عاملی کی شہادت

زین الدین بن علی عاملی، جنہیں شہیدِ ثانی کے نام سے شہرت حاصل ہے، شیعہ فقہاء اور علماء میں سے عظیم شخصیت تھے اور ۹۶۵ ہجری قمری میں وفات پائی۔

وہ بالخصوص الروضۃ البہیۃ جیسی تصانیف کی وجہ سے معروف ہوئے، جو شیعہ فقہ کی تعلیم کے اہم متون میں شمار ہوتی ہے۔

ان کی زندگی سیاسی کشمکش کے ادوار میں دینی علماء کی دشوار حالت کی بھی عکاسی کرتی ہے؛ ایسے ادوار جن میں فکری استقلال انسان کے لئے  سنگین ذاتی خطرات کا باعث بن سکتا تھا۔

آج کا پیغام:

دقیق مطالعہ، دعووں کی تحقیق و تصدیق اور معاشرے کی زندگی میں علم و دینی تحقیق کو اس کا مناسب مقام دے کر دینی معارف کی علمی صحت اور امانت داری کی حفاظت کریں۔

۱۲ اگست: عالمی یومِ نوجوانان

اقوام متحدہ ہر سال ۱۲ اگست کو عالمی یومِ نوجوانان مناتا ہے۔ یہ تاریخ ۱۹۹۹ء میں نوجوانوں کے امور کے ذمہ دار وزراء کی عالمی کانفرنس کے بعد اقوام متحدہ کی جنرل اسمبلی کی منظوری سے مقرر ہوئی۔

اس دن کا مقصد نوجوانوں کے سامنے موجود مواقع اور چیلنجوں کی طرف توجہ دلانا اور معاشروں کی تعمیر میں انہیں مؤثر شریک کے طور پر تسلیم کرنا ہے۔

اسلام نے نوجوانوں کو محض ’’مستقبل‘‘ نہیں سمجھا۔ مسلمان نوجوانوں نے بارہا اسلامی معاشرے کی تشکیل اور دفاع میں فعال کردار ادا کیا ہے۔ علی بن ابی طالب علیہ السلام، مصعب بن عمیر، اسامہ بن زید اور صدرِ اسلام کے  بہت سے دوسرے نوجوان اس بات کی مثال ہیں کہ نوجوان بڑے فکری، روحانی اور اجتماعی فرائض سنبھال سکتے ہیں۔

آج کا پیغام:

 مسلمان نوجوانوں کے بارے میں صرف مستقبل کے طور پر بات نہ کریں؛ ان پر اعتماد کریں، انہیں تعلیم دیں اور بااختیار بنائیں تاکہ وہ آج کے معاشرے کی خدمت میں اپنا کردار ادا کرسکیں۔