سدا بہار قرآنی کہانیاں – جلد 03 شمارہ 38

Everlasting Tales of the Quran – Volume 03 Issue 38

بغیر شمشیر  کےفتح؛ صلحِ حدیبیہ کا  انوکھا  معرکہ

اسلامی ثقافت میں صلح محض ایک اضطراری حکمتِ عملی نہیں، بلکہ ایک بنیادی اصول اور الٰہی قدر ہے۔ قرآنِ کریم صلح کو خیر قرار دیتا ہے:

وَالصُّلْحُ خَيْرٌ
’’اور صلح بہتر ہے۔‘‘

(النساء: 128)

اسی طرح قرآن اہلِ ایمان کو ہمہ گیر طور پر امن و آشتی میں داخل ہونے کی دعوت دیتا ہے:

ادْخُلُوا فِي السِّلْمِ كَافَّةً
’’تم سب کے سب امن و سلامتی میں داخل ہو جاؤ۔‘‘

(البقرہ: 208)

سن 6 ہجری میں پیش آنے والا واقعۂ صلحِ حدیبیہ سیرتِ نبویؐ میں اس تعلیم کی نمایاں ترین عملی مثال ہے؛ ایک ایسی صلح جسے قرآن نے پسپائی نہیں بلکہ ’’فتحِ مبین‘‘ قرار دیا۔

اس شمارے کی داستان اسی تاریخی واقعے پر مبنی ہے۔

احرام باندھے قافلے کی روانگی

تقریباً چودہ سو مسلمان احرام باندھے، خانۂ خدا کی زیارت کی نیت سے رسولِ اکرم صلی اللہ علیہ وآلہ وسلم کے ہمراہ مدینہ سے مکہ کی جانب روانہ ہوئے۔

یہ سفر رسول اللہؐ کے اس سچے خواب کی بنیاد پر تھا جس میں آپؐ نے مسلمانوں کو خانۂ کعبہ کا طواف کرتے اور اپنے سر منڈواتے دیکھا تھا۔

لیکن قریش، جو ایک اور شکست سے خوف زدہ تھے، نے راستہ روک دیا۔ خالد بن ولید کی قیادت میں سوار دستے راستے میں تعینات کر دیے گئے، اور مسلمانوں کا قافلہ حُدیبیہ کے مقام پر رک گیا۔

رسول اللہؐ اپنی پُرامن نیت واضح کرنے کے لئے  چھیاسٹھ قربانی کے اونٹ بھی ساتھ لائے تھے۔

اسی دوران رسول اللہؐ کی اونٹنی قصواء بیٹھ گئی اور آگے بڑھنے سے رک گئی۔ بعض لوگوں نے کہا: ’’قصواء تھک گئی ہے۔‘‘

لیکن رسول اللہؐ نے فرمایا:

’’وہ تھکی نہیں ہے؛ جس قدرت نے ابرہہ کے ہاتھیوں کو روک دیا تھا، اسی نے اسے بھی روک دیا ہے۔ خدا کی قسم! قریش مجھ سے ایسی کوئی بات طلب کریں جس میں اللہ کی حرمتوں کا احترام ہو تو میں اسے قبول کروں گا۔‘‘

حُدیبیہ کا کنواں بھی کم پانی والا تھا۔ رسول اللہؐ نے ایک تیر اس میں ڈالا تو پانی پھوٹ نکلا اور پورا قافلہ سیراب ہو گیا۔

قریش کے نمائندوں کی آمد و رفت

فضا بداعتمادی سے بھری ہوئی تھی۔ قریش کے نمائندے یکے بعد دیگرے رسول اللہؐ کے پاس آتے رہے۔

عروہ بن مسعود ثقفی دھمکی آمیز انداز میں آیا اور گفتگو کے دوران بار بار رسول اللہؐ کی ریشِ مبارک کی طرف ہاتھ بڑھاتا تھا۔ مغیرہ بن شعبہ نے اس کا ہاتھ ہٹاتے ہوئے کہا:

’’اپنا ہاتھ پیچھے رکھو۔‘‘

عروہ نے جب رسول اللہؐ کے لئے  صحابہ کا غیر معمولی احترام دیکھا، یہاں تک کہ وہ آپؐ کے وضو کے پانی کے قطروں کو بھی تبرک کے طور پر حاصل کرنے کی کوشش کرتے تھے، تو حیرت زدہ ہو کر مکہ واپس گیا اور قریش سے کہا:

’’میں کسریٰ، قیصر اور نجاشی کے درباروں میں جا چکا ہوں، لیکن میں نے کسی شخص کو اپنی قوم میں ایسا محترم نہیں دیکھا جیسا محمد اپنے اصحاب میں ہیں۔ ان کی پیشکش قبول کر لو۔‘‘

بیعتِ رضوان

عثمان بن عفان، جو مذاکرات کے لئے  مکہ گئے تھے، وہاں روک لئے  گئے اور مسلمانوں میں یہ افواہ پھیل گئی کہ انہیں شہید کر دیا گیا ہے۔

رسول اللہؐ ایک درخت کے نیچے کھڑے ہوئے اور مسلمانوں کو بیعتِ رضوان کی دعوت دی؛ ایسی بیعت جس میں آخری دم تک ثابت قدم رہنے کا عہد کیا گیا۔

دلوں پر سکینت نازل ہوئی اور مسلمان ایک ایک کر کے رسول اللہؐ کے ہاتھ پر بیعت کرنے لگے۔

معاہدۂ صلح کی تحریر کا آغاز

اس بیعت کے بعد قریش کی جانب سے سہیل بن عمرو نمائندے کے طور پر آیا۔

رسول اللہؐ نے فرمایا:

’’اب معاملہ آسان ہو گیا۔‘‘

حضرت علی علیہ السلام کو معاہدہ لکھنے کی ذمہ داری دی گئی۔

رسول اللہؐ نے فرمایا:

’’لکھو: بِسْمِ اللهِ الرَّحْمٰنِ الرَّحِيمِ۔‘‘

سہیل نے اعتراض کیا:

’’ہم رحمان کو نہیں جانتے؛ لکھو: بِاسْمِكَ اللَّهُمَّ۔‘‘

رسول اللہؐ نے نہایت اطمینان کے ساتھ یہ بات قبول کر لی۔

پھر فرمایا:

’’لکھو: یہ وہ معاہدہ ہے جو محمد رسول اللہ نے۔۔۔‘‘

سہیل نے پھر اعتراض کیا:

’’اگر ہم آپ کو اللہ کا رسول مانتے تو آپ سے جنگ ہی کیوں کرتے؟ لکھو: محمد بن عبداللہ۔‘‘

حضرت علی علیہ السلام کے لئے  عبارت ’’رسول اللہ‘‘ کو مٹانا دشوار تھا۔

رسول اللہؐ نے خود اسے مٹا دیا اور حضرت علیؑ سے فرمایا:

’’اے علی! ایک دن تم بھی ایسی ہی صورتِ حال میں قرار پاؤ گے اور مظلومانہ طور پر ایک تحریر پر دستخط کرو گے۔‘‘

معاہدۂ صلح کی شرائط

معاہدے کی اہم شرائط یہ تھیں:

  • دس سال تک جنگ بندی؛
  • قبائل کو آزادی ہو گی کہ وہ جس فریق کے ساتھ چاہیں معاہدہ کریں؛
  • مسلمان اسی سال حُدیبیہ سے واپس چلے جائیں گے؛
  • اور ایک سخت شرط یہ تھی کہ اگر قریش میں سے کوئی شخص مسلمان ہو کر مدینہ چلا جائے تو اسے واپس مکہ بھیجا جائے گا، لیکن اگر کوئی مسلمان اسلام چھوڑ کر مکہ چلا جائے تو اسے واپس نہیں کیا جائے گا۔

عین اسی وقت سہیل بن عمرو کا بیٹا ابوجندل ہاتھ پاؤں میں زنجیریں ڈالے ہوئے بھاگتا ہوا مسلمانوں کے پاس پہنچا اور مدد کی درخواست کی۔

سہیل چیخ اٹھا:

’’محمد! یہ تمہارے عہد کی پہلی آزمائش ہے؛ اسے واپس کرو۔‘‘

رسول اللہؐ نے غمگین دل کے ساتھ ابوجندل کو تسلی دیتے ہوئے فرمایا:

’’اے ابوجندل! صبر کرو؛ اللہ تمہارے اور تمہارے ساتھیوں کے لئے  کوئی راستہ ضرور پیدا کرے گا۔‘‘

بعض اصحاب کا اعتراض

معاہدے کی ظاہری شرائط بعض مسلمانوں کے لئے  بہت سخت تھیں۔

عمر نے تشویش کے ساتھ کہا:

’’کیا ہم حق پر نہیں ہیں؟ پھر ہم اپنے دین کے معاملے میں یہ ذلت کیوں قبول کریں؟‘‘

رسول اللہؐ نے فرمایا:

’’میں اللہ کا بندہ اور اس کا رسول ہوں۔ میں اس کے حکم کی نافرمانی نہیں کرتا، اور وہ میرا مددگار ہے۔‘‘

رسول اللہؐ نے مسلمانوں کو قربانی کرنے اور احرام سے باہر آنے کا حکم دیا، لیکن ابتدا میں اصحاب تردد کا شکار رہے۔

حضرت اُمّ سلمہ نے مشورہ دیا کہ رسول اللہؐ خود باہر جائیں، قربانی کریں اور سر منڈوائیں؛ لوگ خود آپ کی پیروی کریں گے۔

ایسا ہی ہوا۔ رسول اللہؐ نے عمل کیا اور پھر اصحاب بھی، اگرچہ رنج و تردد کے ساتھ، قربانی کر کے احرام سے باہر آ گئے۔

واپسی اور سورۂ فتح کا نزول

واپسی کے راستے میں کسی نے کہا:

’’یہ کیسی فتح تھی؟ نہ ہم مکہ میں داخل ہوئے اور نہ ہی اپنے ساتھیوں کو اپنے پاس رکھ سکے۔‘‘

رسول اللہؐ نے فرمایا:

’’تم نے بہت غلط بات کہی! یہ تو سب سے بڑی فتح ہے۔ جو دشمن تمہیں نابود کرنا چاہتا تھا، آج وہ خود تم سے صلح کا طالب ہے۔‘‘

اسی موقع پر یہ آیت نازل ہوئی:

إِنَّا فَتَحْنَا لَكَ فَتْحًا مُبِينًا
’’یقیناً ہم نے آپ کے لئے  ایک واضح فتح فراہم کر دی۔‘‘

(سورۂ فتح: 1)

اس بظاہر تلخ فتح کے ثمرات بہت جلد ظاہر ہونے لگے۔

قریش نے معاہدے کی شرط کے مطابق ابوبصیر نامی ایک نو مسلم کو، جو مکہ سے فرار ہو کر مدینہ آ گیا تھا، واپس کرنے کا مطالبہ کیا۔ رسول اللہؐ نے عہد کی پابندی کرتے ہوئے اسے واپس کر دیا۔

لیکن راستے میں ابوبصیر اپنے محافظ سے بچ نکلا اور ساحلی علاقے سیف البحر کی طرف چلا گیا۔

ابوجندل اور درجنوں دوسرے مسلمان نوجوان بھی اس سے جا ملے۔ چونکہ معاہدے کے مطابق وہ مدینہ نہیں جا سکتے تھے، اس لئے  انہوں نے قریش کے تجارتی قافلوں کے راستے میں ٹھکانا بنا لیا۔

اس سے مکہ کی اقتصادی شہ رگ پر ایسا دباؤ پڑا کہ آخرکار قریش نے خود رسول اللہؐ سے درخواست کی کہ اس شرط کو ختم کر دیا جائے اور ان مسلمانوں کو مدینہ بلا لیا جائے۔

یوں وہ صلح جو ابتدا میں بعض لوگوں کو ذلت آمیز نظر آتی تھی، پورے جزیرۂ عرب میں اسلام کے غیر معمولی پھیلاؤ کا راستہ بن گئی اور بالآخر فتحِ مکہ کے لئے  بنیادی مقدمہ ثابت ہوئی۔

صلحِ حدیبیہ سے حاصل ہونے والے اسباق

صلحِ حدیبیہ کا تجزیہ یہ واضح کرتا ہے کہ یہ واقعہ صرف ایک سیاسی یا تاریخی حادثہ نہیں، بلکہ رویّوں کے نظم، اسٹریٹجک سوچ اور اخلاقی طرزِ زندگی کے لئے  ایک جامع مکتبی منشور ہے۔

اس واقعے سے چند اہم سبق اخذ کیے جا سکتے ہیں:

1۔ جذبات اور نعروں پر عقلانیت کی ترجیح

معاہدے کے وقت بہت سے اصحاب دینی جذبات اور وقتی جوش سے متاثر تھے اور قریش کی شرائط قبول کرنے کو ’’ذلت قبول کرنا‘‘ سمجھ رہے تھے۔

رسول اللہؐ نے انہیں سکھایا کہ کبھی کبھی بڑے مقاصد حاصل کرنے اور معاشرے کی بقا و سلامتی کے لئے  ظاہری لچک اختیار کرنا پسپائی نہیں بلکہ حقیقی شجاعت اور عقل مندی ہوتی ہے۔

2۔ حکمتِ عملی میں ’’اصل‘‘ اور ’’فرع‘‘ درمیان فرق

رسول اللہؐ نے رسالت کے اصل مقصد اور اسلام کے وجود کے تحفظ پر کوئی سمجھوتہ نہیں کیا، لیکن الفاظ اور ظاہری عنوانات، جیسے معاہدے سے ’’رسول اللہ‘‘ کی عبارت ہٹانے پر سختی نہیں دکھائی۔

یہ طرزِ عمل سکھاتا ہے کہ مذاکرات اور صلح کے مواقع پر ثانوی عناوین اور ظاہری امور کو اصل مقصد کے حصول میں رکاوٹ نہیں بننے دینا چاہیے۔

3۔ حقیقت کے فروغ میں پُرامن ماحول کی غیر معمولی طاقت

جنگ اور مسلسل کشیدگی ذہنوں کو بند کر دیتی اور نفرتوں کو بڑھاتی ہے۔

رسول اللہؐ نے دکھایا کہ اسلام امن، منطق اور مکالمے کی فضا میں زیادہ مؤثر انداز میں پھیلتا ہے۔

حُدیبیہ کی حقیقی فتح یہی تھی کہ امن قائم ہوا، لوگوں کو سوچنے کا موقع ملا، اور بڑی تعداد میں لوگ اسلام کی طرف متوجہ ہونے لگے۔

4۔ دشمن کے مقابلے میں بھی اخلاق اور عہد کی پابندی

معاہدہ طے ہونے کے فوراً بعد ابوجندل کو قریش کے حوالے کرنا وفائے عہد اور اعتماد سازی کا عظیم سبق ہے۔

اسلام یہ اصول پیش کرتا ہے کہ کسی مقدس مقصد کے حصول کے لئے  بھی غیر اخلاقی طریقوں، دھوکے یا عہد شکنی کو اختیار نہیں کیا جا سکتا۔

5۔ انسانی کرامت، مشورے اور بحران میں سکون کی اہمیت

حضرت اُمّ سلمہ کا دانشمندانہ مشورہ، رسول اللہؐ کا خیمے سے باہر آ کر خود قربانی کرنا اور پھر معاشرے میں دوبارہ سکون پیدا ہونا، اس حقیقت کو ظاہر کرتا ہے کہ مشکل اجتماعی حالات میں مشورہ، باہمی تعاون اور بحران کا پُرسکون انتظام کتنی اہمیت رکھتا ہے۔

صلحِ حدیبیہ کے بنیادی مصادر:

تاریخی واقعۂ صلحِ حدیبیہ اور اس سے متعلق واقعات قرآنِ کریم اور قدیم حدیثی و تاریخی مصادر میں تفصیل کے ساتھ نقل ہوئے ہیں۔

قرآنی ماخذ:

اس واقعے کا سب سے اہم قرآنی ماخذ سورۂ فتح ہے، جو حُدیبیہ سے مدینہ واپسی کے سفر میں نازل ہوئی۔

روائی اور حدیثی مصادر:

  • تفسیر القمی — علی بن ابراہیم قمی، ج 2، ص 302 سے آگے
  • الکافی — ثقة الاسلام کلینی، ج 8، ص 322
  • الإرشاد في معرفة حجج الله على العباد — شیخ مفید، ج 1، ص 119 سے آگے
  • مجمع البيان في تفسير القرآن — شیخ طبرسی، سورۂ فتح کے ذیل میں
  • السيرة النبوية — ابن ہشام، ج 3، ص 308 سے آگے
  • المغازي — محمد بن عمر واقدی، ج 2، ص 571 سے آگے
  • صحیح البخاری — کتاب الشروط، باب الشروط فی الجهاد، حدیث 2731 و 2732
  • الدر المنثور في التفسير بالمأثور — جلال الدین سیوطی، ج 6، ص 71 سے آگے
اس کا اشتراک کریں، اپنا پلیٹ فارم منتخب کریں!

خبریں ان باکس کے ذریعے

نیوز لیٹر کو سبسکرائب کریں۔