حقیقت، حکمت اور مہربانی کے ساتھ آگے بڑھنا

تمہید

آنے والے ہفتے میں داخل ہوتے ہوئے ہمیں متعدد قیمتی تاریخی، روحانی اور انسانی مناسبتوں کا سامنا ہے۔ یہ واقعات ہمیں یاد دلاتے ہیں کہ اسلام دل اور عقل، دونوں کی تربیت کرتا ہے، اور انفرادی عبادت و روحانیت کے ساتھ ساتھ معاشرتی ذمہ داری پر بھی زور دیتا ہے۔

۱۴ صفر: حکیم ملا محمد فیض کاشانی کایوم ولادت  (۱۰۰۷ ہجری قمری)

ملا محمد فیض کاشانی رحمۃ اللہ علیہ، جو ۱۰۰۷ سے ۱۰۹۱ ہجری قمری کے درمیان زندہ رہے، صفوی دور کے عظیم ترین شیعہ علما، فلاسفہ، مفسرینِ قرآن، فقہا اور عرفا میں شمار ہوتے ہیں۔

وہ ملا صدرا کے ممتاز ترین شاگردوں میں سے تھے اور انہوں نے ایک سو سے زیادہ علمی کتابیں تصنیف کیں۔ ان کی اہم ترین تصانیف میں الوافی، المحجۃ البیضاء اور تفسیر الصافی شامل ہیں۔ یہ کتابیں صدیوں گزرنے کے باوجود آج بھی اسلامی فکر اور علمی تحقیقات پر گہرے اثرات مرتب کر رہی ہیں۔

قرآنِ کریم حقیقی صاحبانِ علم کے بارے میں فرماتا ہے:

إِنَّمَا يَخْشَى اللَّهَ مِنْ عِبَادِهِ الْعُلَمَاءُ

“اللہ کے بندوں میں سے صرف صاحبانِ علم ہی حقیقی طور پر اس سے ڈرتے ہیں۔”
(سورۂ فاطر، آیت ۲۸)

یہ آیت ہمیں سکھاتی ہے کہ حقیقی علم انسان کو غرور اور خود پسندی کی طرف نہیں، بلکہ اللہ تعالیٰ کے سامنے عاجزی اور انکساری کی طرف لے جاتا ہے۔

آج کا پیغام:

ایسے علم کی جستجو کریں جو آپ کی عقل کی پرورش کرنے کے ساتھ ساتھ آپ کے اخلاق اور کردار کو بھی بدل دے۔

۱۵ صفر: رسولِ اکرم صلی اللہ علیہ وآلہ وسلم کی بیماری کا آغاز

سنہ گیارہ ہجری میں ماہِ صفر کے آخری ایام کے دوران رسولِ اکرم صلی اللہ علیہ وآلہ وسلم شدید بیماری میں مبتلا ہوئے۔

جسمانی کمزوری کے باوجود آپ صلی اللہ علیہ وآلہ وسلم اپنی حیاتِ مبارکہ کے آخری ایام تک امتِ مسلمہ کو نماز، عدل، مہربانی اور اتحاد کی تاکید فرماتے رہے۔

رسولِ اعظم صلی اللہ علیہ وآلہ وسلم کے اقوال، اعمال اور تعلیمات چودہ صدیاں گزر جانے کے باوجود آج بھی انسانیت کے لئے  اخلاق اور خدا محوری پر مبنی زندگی کا روشن ترین نمونہ ہیں۔

جیسا کہ قرآنِ کریم فرماتا ہے:

لَقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ

“یقیناً تمہارے لئے  رسول اللہ کی ذات میں بہترین نمونہ موجود ہے۔”
(سورۂ احزاب، آیت ۲۱)

آج کا پیغام

رسولِ اکرم صلی اللہ علیہ وآلہ وسلم کی زندگی، اخلاق اور تعلیمات سے مزید آگاہی حاصل کریں، اور اپنی اولاد کی بھی اس طرح تربیت کریں کہ وہ آپ صلی اللہ علیہ وآلہ وسلم کو پہچانے، آپ سے محبت کرے اور آپ کے طرزِ زندگی سے آشنا ہو۔

۱۸ صفر: جنگِ صفین میں اویس قرنی کی شہادت(۳۷ ہجری قمری)

اویس قرنی ابتدائی اسلامی دور کے مخلص ترین مؤمنین میں سے تھے۔

اگرچہ اپنی ضعیف العمر والدہ کی دیکھ بھال کی وجہ سے انہیں رسولِ اکرم صلی اللہ علیہ وآلہ وسلم کی ظاہری ملاقات کا شرف حاصل نہ ہوسکا، لیکن رسول اللہ صلی اللہ علیہ وآلہ وسلم نے ان کے اخلاص اور تقویٰ کی تعریف فرمائی۔

بعد میں وہ امیرالمؤمنین امام علی علیہ السلام کے ساتھ شامل ہوئے اور جنگِ صفین میں شہید ہوگئے۔

ان کی زندگی ہمیں بتاتی ہے کہ حقیقی عزت شہرت یا دنیاوی منصب میں نہیں، بلکہ اخلاص، والدین کے ساتھ نیکی اور عدل کے ساتھ وفاداری میں ہے۔ رسولِ اکرم صلی اللہ علیہ وآلہ وسلم نے فرمایا:

إِنَّ أُوَيْسًا خَيْرُ التَّابِعِينَ

“بے شک اویس تابعین میں سے بہترین افراد میں ہیں۔”
(معالم الفتن، جلد ۲، صفحہ ۷۵)

آج کا پیغام

اپنے والدین کی مخلصانہ اور بے منت خدمت کا موقع اور توفیق ضائع نہ کریں۔

۲۰ صفر: اربعینِ امام حسین علیہ السلام

بیس صفر، امام حسین علیہ السلام اور کربلا میں شہید ہونے والے آپ کے وفادار اصحاب کی شہادت کا چالیسواں دن ہے۔

آج اربعین دنیا میں مسلمانوں کے سب سے بڑے سالانہ اجتماعات میں سے ایک بن چکا ہے۔ یہ اجتماع عدل، حقیقت اور انسانی عظمت کی راہ میں دی جانے والی عظیم قربانی کی یاد دلاتا ہے۔

اربعین تمام انسانوں کو یاد دلاتا ہے کہ ظلم کبھی بھی حقیقت کی آواز کو خاموش نہیں کرسکتا۔

امام حسین علیہ السلام کا قیام آج بھی ظلم، فساد اور استبداد کے خلاف جدوجہد کرنے والوں کے لئے  سرچشمۂ الہام ہے۔

آج کا پیغام

عدل کے دفاع میں ثابت قدم رہیں، خواہ اس کی قیمت کتنی ہی بھاری کیوں نہ ہو۔

۲۰ صفر: اہلِ بیت علیہم السلام کی کربلا واپسی

امام حسین علیہ السلام کے اہلِ بیت علیہم السلام، اسیری سے آزادی کے بعد بیس صفر کو کربلا واپس تشریف لائے۔

انہوں نے اپنے عزیزوں کے لئے  سوگواری کرنے کے ساتھ ساتھ کربلا کے ابدی اور جاوداں پیغام کی تجدید کی۔

ان کی یہ واپسی ناقابلِ بیان مصائب کے مقابلے میں صبر، استقامت اور ثابت قدمی کی ایک حیرت انگیز مثال ہے۔

انہوں نے مصیبت اور غم کو حقیقت کی آواز دبانے کی اجازت نہ دی، بلکہ اپنے رنج و اندوہ کو آنے والی نسلوں کی اخلاقی بیداری کا ذریعہ بنا دیا۔

قرآنِ کریم فرماتا ہے:

وَلَا تَهِنُوا وَلَا تَحْزَنُوا وَأَنْتُمُ الْأَعْلَوْنَ إِنْ كُنْتُمْ مُؤْمِنِينَ

“کمزور نہ پڑو اور غمگین نہ ہو، اگر تم مؤمن ہو تو تم ہی سربلند رہو گے۔”
(سورۂ آلِ عمران، آیت ۱۳۹)

آج کا پیغام

دکھ، تکلیف اور مشکلات کو امید، ترقی اور مثبت و تعمیری عمل میں تبدیل کریں۔

۲۰ صفر: امام حسین علیہ السلام کے سرِ مبارک کا جسدِ اطہر کے ساتھ الحاق

امام حسین علیہ السلام کا سرِ مبارک، جسے واقعۂ کربلا کے بعد آپ کے جسمِ اطہر سے جدا کردیا گیا تھا، بیس صفر کو دوبارہ آپ کے جسدِ مبارک کے ساتھ ملایا گیا۔ اللہ تعالیٰ فرماتا ہے:

وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ

“جو لوگ اللہ کی راہ میں قتل کیے گئے ہیں، انہیں ہرگز مردہ خیال نہ کرو، بلکہ وہ زندہ ہیں اور اپنے پروردگار کے پاس رزق پاتے ہیں۔”
(سورۂ آلِ عمران، آیت ۱۶۹)

آج کا پیغام

ظالموں کی ناپاک نیتوں اور مذموم کوششوں سے انسانی کرامت کبھی ختم نہیں ہوسکتی۔

جس طرح صدیاں گزرنے کے باوجود امام حسین علیہ السلام کی عظمت اور کرامت ہر روز پہلے سے زیادہ روشن اور نمایاں ہوتی جارہی ہے۔

۸ مرداد – ۳۰ جولائی: شیخ شہاب الدین سہروردی کی یاد

شیخ شہاب الدین سہروردی، جو ۵۴۹ سے ۵۸۷ ہجری قمری کے درمیان زندہ رہے، شیخِ اشراق کے نام سے مشہور ہیں۔

وہ فلسفۂ اشراق کے مکتب کے بانی تھے۔ ان کی فلسفیانہ تصانیف نے عقل اور روحانی شہود کو ایک دوسرے کے ساتھ جوڑا اور اسلامی فلسفے پر دائمی اثرات مرتب کیے۔

ان کا علمی و فکری ورثہ اس حقیقت کی یاد دہانی کراتا ہے کہ عقل اور وحی ایک دوسرے کی تکمیل کرتے ہیں۔

علمی ترقی کو ایمان کو مزید روشن اور مضبوط بنانا چاہیے، نہ کہ اسے کمزور کرنا چاہیے۔

آج کا پیغام

اپنے آپ کو اور اپنی اولاد کو حصولِ علم کی ترغیب دیں، اور اس کے ساتھ ساتھ ایمان، روحانیت اور معنویت کو بھی گہرا کرنے کی کوشش کریں۔

۳۰ جولائی: دوستی کا عالمی دن

اقوامِ متحدہ نے ۳۰ جولائی کو دوستی کا عالمی دن قرار دیا ہے، تاکہ اقوام، ثقافتوں اور معاشروں کے درمیان دوستی کو امن، مکالمے اور باہمی افہام و تفہیم کے فروغ کا ذریعہ بنایا جاسکے۔

اسلامی نقطۂ نظر سے دوستی محض ایک معاشرتی تعلق نہیں، بلکہ ایمان کو مضبوط کرنے، معاشرے کی خدمت کرنے اور امن، محبت اور ہمدردی کو فروغ دینے کا ایک وسیلہ ہے۔

آج کا پیغام

ایسی دوستیاں قائم کریں جو ایمان، مہربانی اور معاشرتی یکجہتی کو مضبوط بنائیں۔