قرآن ہمارا زندہ رہنما: اللہ کے کلام پر عمل کرنے کی اہمیت

مقدمہ

ماہِ مبارک رمضان کی پندرہویں تاریخ، امام حسن مجتبیٰ علیہ السلام کی بابرکت ولادت کا دن ہے۔ ہم اسی ماہِ رمضان میں ہیں جو نزولِ قرآن کا مہینہ ہے۔ ان دو عظیم نعمتوں کی روشنی میں، ہم امام حسنؑ کے ایک گہرے بیان پر غور کرتے ہیں جو مؤمن اور قرآن کے حقیقی تعلق کو بیان کرتا ہے؛ ایسا تعلق جو صرف تلاوت تک محدود نہیں بلکہ اس کے مطابق زندگی گزارنے تک پہنچتا ہے۔

امام حسن بن علی علیہ السلام: «ما بَقِىَ فِى الدُّنْيا بَقِيَّةٌ غَيْرَ هَذَا القُرآنِ فَاتَّخِذُوهُ إماما يَدُلُّكُمْ عَلى هُداكُمْ، وَإنَّ أَحَقَّ النّاسِ بِالقُرآنِ مَنْ عَمِلَ بِهِ وَإنْ لَمْ يَحْفَظْهُ، وَأَبْعَدَهُمْ مِنْهُ مَنْ لَمْ يَعْمَلْ بِهِ وَإنْ كانَ يَقْرَأُهُ»

« دنیا میں اب کچھ باقی نہیں رہا ،سوائے اس قرآن کے؛ پس اسے اپنا پیشوا بناؤ تاکہ وہ تمہیں راہ راست کی طرف رہنمائی کرے۔ بے شک قرآن کے سب سے زیادہ حق دار وہ لوگ ہیں جو اس پر عمل کرتے ہیں، اگرچہ اسے حفظ نہ کیا ہو؛ اور سب سے زیادہ دور وہ ہیں جو اس پر عمل نہیں کرتے، اگرچہ اسے پڑھتے ہوں.»

(ارشاد القلوب، دیلمی، ص 102)

مندرجہ بالا حدیث سےنوجوانوں اور جوانوں کے لیے تربیتی پیغامات:

1۔  اپنی زندگی کو قرآن کے معیار پر پرکھو

اپنے قول، فعل اور طرزِ زندگی کو قرآنی تعلیمات کے ساتھ موازنہ کرو تاکہ تم ترقی کر سکو؛ کیونکہ جس چیز سے تم آگاہ نہ ہو، اسے درست بھی نہیں کر سکتے۔

عملی چیلنج: ہر رات اپنے آپ سے پوچھو: “کیا آج میرا رویہ قرآنی اقدار کا آئینہ دار تھا؟” اور اصلاح کے لیے ایک نکتہ لکھ لو۔

2۔ تلاوت ایسی ہو، جو ہمیں عمل  کی جانب لے جائے

قرآن پڑھنا اور یاد کرنا تمہید ہے؛ اصل مقصد اس کے مطابق زندگی گزارنا ہے۔

عملی چیلنج: اس ہفتے جو بھی آیت پڑھو یا یاد کرو، اس کے مطابق ایک چھوٹا عملی قدم بھی اٹھاؤ۔

3۔ قرآن رہنما ہے، صرف کتاب نہیں۔

قرآن کو تمہارے فیصلوں میں کردار ادا کرنا چاہیے، نہ کہ صرف شیلف میں رکھا رہ جائے۔

عملی چیلنج: اس ہفتے کسی اہم فیصلے سے پہلے خود سے پوچھو: “کیا یہ عمل قرآن کی تعلیمات سے ہم آہنگ ہے؟”

4۔ عمل، حفظ سے زیادہ اہم ہے

ایک آیت پر عمل کرنا، بہت سی آیات یاد کرنے سے بہتر ہے اگر ان پر عمل نہ کیا جائے۔

عملی چیلنج: ایک مختصر آیت منتخب کرو اور اس ہفتے اسے اپنے رویے میں نافذ کرو۔

5۔ قرآن کو اپنی مجازی زندگی کا بھی رہنما بناؤ

قرآن کی ہدایت صرف عملی زندگی تک محدود نہیں بلکہ آن لائن دنیا کو بھی شامل کرتی ہے۔

عملی چیلنج: اس ہفتے کوئی ایسا مواد شائع نہ کرو جو اسلامی اور قرآنی اقدار سے متصادم ہو۔

6۔ روزانہ تدبر سے قربت برقرار رکھو

اگرچہ مختصر ہی کیوں نہ ہو، مگر مستقل تعلق دل کو زندہ رکھتا ہے۔

عملی چیلنج: روزانہ پانچ منٹ کسی ایک آیت کی تلاوت اور اس پر غور کے لیے مختص کرو۔

والدین کے لیے تربیتی پیغامات:

1۔ قرآن پر عمل کے ہفتہ وار چیلنج بنائیں

اپنے بچوں کو تلاوت سے عمل تک لے جانے میں مدد دیں اور ہر ہفتے ایک آیت پر توجہ دیں۔

عملی چیلنج: ہر ہفتے ایک آیت منتخب کریں اور گھر میں اس پر عمل کا مشترکہ ہدف مقرر کریں۔

2۔ تلاوت میں سرمایہ کاری کریں، مگر عمل کو مقدم رکھیں

حفظ اور قراءت ضروری بنیاد ہیں، مگر اصل مقصد قرآن کے مطابق زندگی گزارنا ہے۔

عملی چیلنج: حفظ کے پروگرام کے ساتھ ہر ہفتے ایک آیت کے عملی اطلاق پر گفتگو کریں۔

3۔  خود قرآنی کردار کا نمونہ بنیں

بچے سننے سے زیادہ دیکھ کر سیکھتے ہیں۔

عملی چیلنج: اس ہفتے گھر میں کسی ایک قرآنی قدر کو اپنے عمل سے ظاہر کریں اور اس کی وضاحت بھی کریں۔

4۔ قرآن کو روزمرہ زندگی سے جوڑیں

یہ دکھائیں کہ قرآن حقیقی زندگی کے مسائل کا جواب دیتا ہے۔

عملی چیلنج: کسی خاندانی مسئلے پر قرآنی اصول کی روشنی میں گفتگو کریں۔

5۔ گھر میں قرآنی ماحول پیدا کریں

گھر کا ماحول ایمان کی تشکیل میں بنیادی کردار ادا کرتا ہے۔

عملی چیلنج: ایک رات خاندانی تلاوت اور ایک آیت پر گفتگو کے لیے مخصوص کریں۔

ائمۂ جماعت، اساتذہ اور علما کے لیے تربیتی پیغامات:

1۔ ہر موضوع کو قرآن سے جوڑیں

جس مسئلے پر گفتگو کریں، اسے قرآن کی آیات سے مربوط کریں تاکہ لوگ قرآن اور زندگی کے تعلق کو سمجھ سکیں۔

عملی چیلنج: اپنی آئندہ تقریر یا درس میں کم از کم ایک متعلقہ آیت کا حوالہ دیں۔

2۔ تلاوت سے بڑھ کر عمل پر زور دیں

معاشرے کو یاد دلائیں کہ قرآن مؤمنانہ اقدام کی دعوت دیتا ہے۔

عملی چیلنج: آئندہ خطبے میں کسی ایک آیت پر عمل کا عملی طریقہ بیان کریں۔

3۔ ذاتی ذمہ داری کو فروغ دیں

قرآن سے حقیقی تعلق انسان کی شخصیت کو بدل دیتا ہے۔

عملی چیلنج: سامعین سے کہیں کہ وہ کسی ایک آیت کی روشنی میں اپنے رویے میں تبدیلی لائیں۔

4۔ اپنے عمل سے پیش قدمی کریں

آپ کا کردار آپ کی باتوں کو اعتبار دیتا ہے۔

عملی چیلنج: عدل یا رحمتِ قرآنی پر مبنی کسی سماجی اقدام کی خود ابتدا کریں اور اسے اعلان کریں۔