جب کلینڈر، زندگی کا مدرسہ بن جائے

مقدمہ

کلینڈرمحض تاریخوں کے ایک مجموعے کا نام نہیں ہے۔ ایک مؤمن کے لیےکلینڈر ایک ایسے مدرسے میں تبدیل ہو سکتاہے جہاں اسے یاد دہانی، احساسِ ذمہ داری اور عمل کا درس ملے؛ ایسا مدرسہ جو ماضی کے اسباق کو آج کے اخلاقی سوالات سے جوڑتا     ہو۔

اس ہفتے کی مناسبتیں فارسی ادب، اسلامی علوم، ناانصافی کے خلاف مزاحمت، علمی خدمت اور ذہنی صحت کے بڑھتے ہوئے اہم مسئلے کو ایک ساتھ ہمارے سامنے لاتی ہیں۔

۲۶ ربیع الثانی: آقا نجفی قوچانی کا یومِ وفات

آقا نجفی قوچانی (۱۸۷۸ء–۱۹۴۴ء) شیعہ مکتبِ فکر کے ممتاز علماء اور فقہاء میں سے تھے۔ انہوں نے قوچان، مشہد، اصفہان اور نجف میں تعلیم حاصل کی اور نجف میں آخوند محمد کاظم خراسانی سمیت کئی بڑے علماء سے کسبِ علم کیا۔

بعد ازاں وہ قوچان واپس آگئے اور اپنی زندگی کے کئی سال وہاں تدریس، معاشرتی رہنمائی اور حوزۂ علمیہ کے انتظام و انصرام میں صرف کیے۔

وہ بالخصوص اپنی دو کتابوں کی وجہ سے معروف ہیں:

• سیاحتِ شرق: ان کی زندگی کے حالات پر مشتمل خودنوشت۔
• سیاحتِ غرب: عالمِ برزخ اور موت کے بعد انسان کے سفر کے بارے میں ایک کتاب۔

ان کی زندگی علم، روحانی تفکر اور عام لوگوں کے ساتھ گہرے تعلق کا حسین امتزاج تھی۔

آج کا پیغام: ایسے علم کی جستجو کیجیے جو آپ کے طرزِ زندگی کو تبدیل کر دے، نہ کہ محض ایسا علم جو آپ کے معلومات کے ذخیرے میں اضافہ کرے۔

۲۶ ربیع الثانی: سید مجتبیٰ موسوی لاری کا یومِ وفات

سید مجتبیٰ موسوی لاری (۱۹۲۵ء–۲۰۱۳ء) لار سے تعلق رکھنے والے شیعہ عالم تھے۔ انہوں نے قم میں دینی تعلیم حاصل کی اور اسلامی تعلیمات کو عصرِ حاضر کے قارئین اور سامعین کے لیے قابلِ فہم انداز میں پیش کرنے کے حوالے سے شہرت حاصل کی۔

ان کی تصانیف میں اسلامی اخلاق، الٰہیات، معاد، نبوت اور امامت جیسے موضوعات شامل ہیں۔

ان کی سرگرمیاں صرف تصنیف و تالیف تک محدود نہیں تھیں؛ بلکہ انہوں نے ایک فلاحی ادارہ بھی قائم کیا، جو محروم افراد کی مدد کرتا تھا اور نوجوانوں کے درمیان بھی سرگرمِ عمل تھا۔ اسی طرح انہوں نے دیہی علاقوں میں مساجد، مدارس اور طبی مراکز کے قیام میں بھی حصہ لیا۔

ان کی کتاب تمدنِ غرب از دیدگاہِ مسلمان بھی ہے، جس کا متعدد زبانوں میں ترجمہ کرکے اسے شائع کیا گیا۔

آج کا پیغام: اسلامی علوم و تعلیمات کو بالخصوص نوجوان نسل کے لیے قابلِ فہم، عصرِ حاضر کی ضروریات سے ہم آہنگ اور مفید بنائیں۔

10 اکتوبر: عالمی یومِ ذہنی صحت

ہر سال ۱۰ اکتوبر کو عالمی یومِ ذہنی صحت منایا جاتا ہے، تاکہ ذہنی صحت سے متعلق مسائل کے بارے میں آگاہی میں اضافہ ہو اور دنیا بھر میں ذہنی صحت اور نفسیاتی بہبود کے تحفظ و فروغ کے لیے کوششوں کو تقویت دی جا سکے۔

اسلام، خداوندِ متعال پر ایمان کو انسان کی ذہنی صحت اور باطنی سکون کے بہترین اور مؤثر ترین ذرائع میں سے ایک قرار دیتا ہے۔ قرآنِ کریم ارشاد فرماتا ہے:

الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ أَلَا بِذِكْرِ اللَّهِ تَطْمَئِنُّ الْقُلُوبُ

ترجمہ: ’’یہ وہ لوگ ہیں جو ایمان لائے اور جن کے دل اللہ کے ذکر سے اطمینان حاصل کرتے ہیں۔ آگاہ ہو جاؤ! اللہ کے ذکر ہی سے دلوں کو اطمینان حاصل ہوتا ہے۔‘‘

آج کا پیغام: ایسے دور میں جب دینی عقائد سے دوری کا رجحان بڑھتا جا رہا ہے، خداوندِ متعال پر پختہ اور عملی ایمان بدستور انسانی جسم و روح کی صحت، باطنی سکون اور مشکلات کے مقابلے میں ثابت قدمی کی بنیادی اور قابلِ اعتماد ترین بنیادوں اور سرچشموں میں سے ایک ہے۔

10 اکتوبر: ڈاکٹر محمد ابراہیم آیتی کا یومِ وفات

ڈاکٹر محمد ابراہیم آیتی (۱۲۹۳ھ شمسی–۱۳۴۳ھ شمسی) ایک دانشور، مؤرخ، استاد اور مترجم تھے، جنہوں نے اسلامی علوم کی روایتی تعلیم کو جدید جامعاتی تعلیم کے ساتھ یکجا کیا۔

انہوں نے تہران یونیورسٹی سے اسلامی فلسفے میں ڈاکٹریٹ کی ڈگری حاصل کی اور اسی یونیورسٹی میں تاریخِ اسلام اور اس سے متعلق موضوعات کی تدریس بھی کی۔

انہوں نے اپنے پیچھے متعدد تصانیف اور تراجم چھوڑے، جن میں رسولِ اسلام صلی اللہ علیہ وآلہ وسلم کی سیرت، تاریخِ اسلام و اندلس اور تاریخِ عاشورا کے موضوعات پر کتابیں شامل ہیں۔ اس کے علاوہ انہوں نے عربی اور انگریزی زبانوں سے اہم تراجم بھی کیے۔

آج کا پیغام: خود کو، اپنے اہلِ خانہ کو اور اپنے قارئین و مخاطبین کو معتبر اسلامی اور دینی مصادر سے روشناس کرائیں۔

۲۸ ربیع الثانی: علامہ عبدالحسین امینی کا یومِ وفات

علامہ عبدالحسین امینی (۱۹۰۹ء–۱۹۷۰ء) شیعہ مکتبِ فکر کے ممتاز علماء اور محققین میں سے تھے۔ وہ سب سے زیادہ اپنی عظیم اور متعدد جلدوں پر مشتمل کتاب الغدیر کی وجہ سے معروف ہیں۔ اس کتاب میں غدیر خم کے موضوع پر عربی حدیثی، تاریخی اور ادبی مصادر کا ایک وسیع ذخیرہ جمع اور اس کا تحقیقی جائزہ پیش کیا گیا ہے۔

انہوں نے مخطوطات اور تاریخی مصادر کی تلاش میں وسیع سفر کیے، جن میں عرب ممالک اور ہندوستان کے سفر بھی شامل تھے۔

انہوں نے نجف میں مکتبۃ امیرالمؤمنین العامۃ بھی قائم کی۔ کتابوں اور قلمی نسخوں کو جمع کرکے انہوں نے علمی تحقیقات کے لیے ایک اہم اور قیمتی کتب خانہ وجود میں لایا۔

ایک شدید بیماری میں مبتلا ہونے کے بعد وہ ۱۹۷۰ء میں تہران میں وفات پا گئے اور اسی کتب خانے کے قریب سپردِ خاک کیے گئے جس کی بنیاد انہوں نے خود رکھی تھی۔

آج کا پیغام: خود کو اور اپنی اولاد کو امیرالمؤمنین حضرت علی علیہ السلام کی بصیرت افروز تعلیمات سے آشنا کریں اور کوشش کریں کہ ان تعلیمات پر عمل کرنے میں ایک دوسرے سے آگے بڑھیں۔

12 اکتوبر: حافظ شیرازی کی یاد منانے کا دن

شمس الدین محمد حافظ شیرازی (تقریباً ۱۳۱۵ء–۱۳۹۰ء) فارسی زبان کے عظیم ترین غزل گو شعرا میں شمار ہوتے ہیں۔ ان کے دیوان نے فارسی زبان، ادب اور ثقافت پر گہرے اثرات مرتب کیے ہیں۔

حافظ کی شاعری خصوصاً اس اعتبار سے ممتاز ہے کہ وہ اخلاقی، فلسفیانہ، عرفانی اور حتیٰ کہ سیاسی موضوعات کو بھی غزل کے قالب میں پیش کرتے ہیں۔ان کی شاعری میں قرآنی تعبیرات اور دینی اشارات بھی بارہا استعمال ہوئے ہیں، اگرچہ ان کے کلام میں علامتی معانی کی متعدد تہیں موجود ہیں، جن کی وجہ سے مختلف تفسیری آراء سامنے آئی ہیں۔

آج کا پیغام: الفاظ کو حکمت، حسن اور اخلاقی بیداری تک پہنچنے کا ذریعہ بننے دیجیے، نہ کہ محض تفریح و دل بہلانے کا وسیلہ۔

یکم جمادی الاولیٰ: میرزائے شیرازی کی جانب سے تمباکو کی حرمت کا فتویٰ

۱۸۹۰ء میں ناصرالدین شاہ نے تمباکو کے وسیع اختیارات برطانوی تاجر میجر جیرالڈ ٹالبوٹ کو دے دیے۔ اس کے نتیجے میں ریجی کمپنی کو ایران کے تمباکو کی خریداری، فروخت اور برآمدات پر وسیع اختیار حاصل ہوگیا۔

جیسے جیسے اس امتیاز کے ذلت آمیز نتائج واضح ہوتے گئے، تاجروں، علماء اور عام لوگوں میں اس کے خلاف مخالفت بڑھتی گئی۔

یکم جمادی الاولیٰ ۱۳۰۹ھ قمری کو میرزائے شیرازی نے اس امتیاز کے پس منظر میں تمباکو کے استعمال کی حرمت کا اپنا مشہور فتویٰ صادر فرمایا۔

یہ فتویٰ بہت تیزی سے پھیل گیا اور عوام کی وسیع اور مسلسل مخالفت نے بالآخر اس امتیاز کی منسوخی میں اہم کردار ادا کیا۔

آج کا پیغام: ایمان محض ایک نجی عقیدہ نہیں ہے؛ بلکہ جب اجتماعی مفادات داؤ پر لگے ہوں تو یہی ایمان انسان کو اصولی، باشعور اور ذمہ دارانہ اقدام کی دعوت بھی دے سکتا ہے۔